السيسى يفتتح معرض القاهرة الدولي للكتاب

– الطريق الدائري:
لو أنت جاي من الأقاليم ممكن تنزل سلم الدائري اللي قبل شبرا .. وهناك عند السلم هتلاقي ميكروباصات التجمع الخامس .. وتنزل مركز مصر للمعارض الدولية اللي فيه المعرض.
– رمسيس:
لو أنت جاي بالقطار من أي مكان أو قريب من وسط البلد عموما .. ميكروباصات التجمع الخامس هتلاقيها عند مسجد الفتح .. وهتلاقي أتوبيسات النقل العام رقم 1018 و1064.
– موقف السلام:
لو أنت جاي من الأقاليم أو قريب من موقف السلام .. هناك هتلاقي ميكروباصات وباصات التجمع الخامس باستمرار .. وأتوبيسات النقل العام 505.
– المنيب:
لو أنت جاي من الجيزة أو أكتوبر هتلاقي جنب مترو المنيب ميكروباصات التجمع الخامس.
– الحي العاشر:
لو أنت جاي من مدينة نصر ممكن تركب أي عربية للحي العاشر.. هتلاقي موقف التجمع الخامس.
– السيدة عائشة:
لو أنت جاي من أكتوبر أو المعادي ممكن تركب أي ميكروباص للسيدة عائشة وهناك هتلاقي ميكروباصات للتجمع الخامس أو أتوبيس النقل العام 716.
– التحرير – عبد المنعم رياض-:
أتوبيس النقل العام M5.

معرض القاهرة الدولي للكتاب

المواصلات اللي فوق دي متوافرة طول السنة وتقدر تركب منها عادي في أي وقت .. اللي جاي بقى خطوط حصرية من مواصلات مصر (الأتوبيسات المحترمة دي) لزوار معرض الكتاب (هتلاقي على الأتوبيسات لوجو المعرض) .. وكمان هياخدوا خصم 35% على التذكرة لو دفعت بكارت الدفع الذكي اللي تقدر تشتريه من أي سائق وتقدر تشحنه عن طريق فوري:
الخط الأول .. صقر قريش – معرض الكتاب:
يبدأ من منطقة صقر قريش مرورا بكارفور المعادى ونادى وادى دجلة والطريق الدائرى ومحور المشير ثم معرض الكتاب.
الخط الثاني .. التحرير – معرض الكتاب:
يبدأ من ميدان عبد المنعم رياض مرورا برمسيس والعباسية وجامعة الأزهر ومحور المشير ثم معرض الكتاب.
الخط الثالث .. العباسية – معرض الكتاب:
يبدأ من العباسية مرورا بنادى السكة وجامعة الأزهر ومحور المشير ثم معرض الكتاب.
الخط الرابع .. ميدان الجيزة – معرض الكتاب:
يبدأ من ميدان الجيزة مرورا بجامعة القاهرة والسيدة عائشة والاتوستراد وجامعة الأزهر ثم معرض الكتاب.
الخط الخامس .. النزهة – معرض الكتاب:
يبدأ من النزهة الجديدة مرورا بميدان الحجاز والسبع عمارات ومكرم عبيد ومصطفى النحاس
والمنهل والوفاء والأمل ثم معرض الكتاب.
الخط السادس .. الأميرية – معرض الكتاب:
يبدأ من الأميرية مرورا بميدان المطرية والحلمية فكلية البنات وميدان رابعة والحى السابع
وحى السفارات ثم معرض الكتاب.
في ميكروباصات ممكن تنزلك شارع التسعين .. إنزل عادي وعدي الطريق واركب أي عربية رايحة ناحية مدينة نصر أو الحي العاشر هتنزلك أمام مركز مصر للمعارض الدولية.
هااااااام جدًا: لو نزلت الناحية المقابلة لأرض المعارض أوعى تعدي من تحت ..
اطلع سلم المشاة وعدي وماتكسلش .. الطريق خطر جدا وواسع جدا والعربيات بتمشي على 180 عادي!
ولو جاي بعربيتك أو أنتم مجموعة وجايين بعربية واحد فيكم وشايل هم الركنة ..
في موقف في المعرض يستوعب 3500 سيارة وجاري إنشاء موقف آخر ليستوعب 2500 سيارة.